اه من الفراق

آه من الفراق
كلمات الشاعر الرائع : بهاء الدين محمد
لحن وغناء : عمرو دياب
توزيع : حسن الشافعى

الله على دى اغنيه

الأغنيه دى فعلا تعتبر من اكتر الأغانى المميزه من حيث اللحن وكمان الكلمات , فيها تجتمع كل مكونات القصه والدراما من حيث مقدمه للأحداث ومن ثم تطور للموقف وحدوث المشكله وفى النهايه نتيجه كل اللى مر بينا من احداث , فحابب اكيد اننا نلاحظ الكلمات هنلاقيها صعب انها تتلحن ورغم ذلك عمرو فعلا وضع لحن رائع جدا حافظ على جمال ورونق الكلمات والأغنيه فى رأى افضل لحن عمله عمرو فى الأغانى اللى قام بتلحينها
وتكمن فكره الأغنيه فى وجود حبيبين تجمع بينهم قصه حب ومن ثم يتفق كل منهم انهاء هذه القصه والحفاظ على هذه العلاقه فى شكل صداقه فيشرح لنا الشاعر حال كل منهم من خلال عده مواقف تمر بيهم فى هذه الأغنيه

آه من الفراق اللي يتفقوا الحبايب فيه يبقوا صحاب .. آه من الفراق اللي بنشوف الحبايب فيه ده أصعب عذاب

طبعا هنا فى الكوبليه ده بيضع لينا الشاعر مقدمه لأحداث القصه وهو بيتألم لما يشوف حبيبين بينهم قصه حب كبيره ومشاعر قويه وفجأه وبقرار سريع يتفقوا على انهاء هذه المشاعر وتحويلها فقط لصداقه
و ياعيني على اللي كان بيحب التاني أكتر .. بيهرب من المكان و بيبقى عذابه أكبر
وهنا الشاعر بيوضح لينا ان قصه الفراق هنا مش فراق عادى ممكن ننساه مع الزمن لأن هنا الفراق مش فراق لأنهم دائما بيتقابلوا وبتجمعهم اماكن كتير فبتالى استحاله تنسى حد وخاصه لما تكون فيه مشاعر اتجاه وهو دائما قدامك فهنا الشاعر بيقول ان اصعب حاجه لما تلاقى حدا فيهم بيحب التانى اكتر وطبعا هو محددش مين لأنه بيتكلم بشكل عام واللى بتلاقيه فعلا بيحب حبيبه وبيساعده على القرار اللى اخده ويهرب من المكان اللى بيكون موجود فيه والشاعر هنا بيقصد بعذابه اكبر ان الحبيب اللى بيهرب لسه بيحب حبيبه ولكن بيفضل انه يمشى رغم وجوده وانه ممكن يشوفه لايمانه ان البعد افضل طريقه للنسيان

و ياعيني على اللقا من غير غيرة و عتاب .. ده مافيش بين الصحاب غيرة و عتاب

الكوبليه ده بصراحه رائع جدا وبتكون هنا احداث الدراما اللى فى قصه وصلت قمتها لما يوصف لنا شكل لقائهم عامل ازاى فمن المعروف ان الغيره والعتاب لما تزيد عن حدودها بتكون من سلبيات الحب فهنا الشاعر واصف لقائهم ان خالى من الغيره والعتاب لأن ده الطبيعى بين الأصدقاء فبيقول وايه فايده اللقا بينا لو غابت غيرتك عليا وايه فايده اللقا ده لو هى مش بتعاتبنى كوبليه رائع بصراحه

وافقته غصب عني .. وافقني غصب عنه .. مابانش ضعف مني .. ما بانش ضعف منه
و مشينا كل واحد راضي بالاتفاق .. و بان حزنه كله و ضعفه لما فاق

وهنا الشاعر انتقل من الشكل العام إلى الحاله الخاصه والأحداث والشعور للفراق ده وهنا الشاعر بيوضح لنا انهم لسه بيحبوا بعض ولكن علشان ميبعدوش عن بعض نهائى فنلاقيهم اتفقوا انهم يبقى اصحاب وطبعا كل واحد فيهم رضى بالأتفاق ده رغم انهم مش مقتنعين اساسا بالفكره وزى العاده فى المواقف دى الكبرياء والعناد بيلعبوا دورهم ويوافق كل واحد فيهم على القرار ده وبعد طبعا لما يهدوا يحصل اثاره للذكريات وحنين للحب ده ويقول كل واحد فيهم ايه اللى عملنا ده وهنا طبعا قمه الحزن والضعف اللى بيتعرض له الحبيبن لما فاقوا من غيبوبه العناد اللى كانوا فيها
دلوقتي لقانا هادي .. قال يعني شوقنا غايب ....و يبان كلامنا عادي مع انه كلام حبايب
وهنا المبدع بهاء الدين محمد بياخدنا معاه علشان نشوف نتيجه الأتفاق ده ايه وايه اللى حصل بعده وهنا الحبيبين طبعا بيخفوا مشاعرهم فبيبان لقائهم هادى وحتى طريقه كلامهم بيتكون عاديه خاليه من الأشواق رغم الأشواق والحنين الموجود جواهم وده اللى عرفنا من الكوبليه اللى فات لكن محدش عاوز يرجع فى كلامه ويلغى القرار ده

و إن شفته ويا غيري يطول في السلام .. و شافني شايفه يعند و يطوّل في الكلام

الكوبليه ده بصراحه اجمل كوبليه فى الأغنيه كلها وقمه الأبداع من بهاء الدين محمد فى وصف شعور كل واحد منهم بكلمات قليله جدا وهنا شوف الأبداع لما وصف حاله الحبيب بأنه متابع حبيبته وبيحسبلها كلامها وكمان وقتها فبيتابع هى سلمت على مين وكمان علشان يبين لسه الحب موجود والغيره كمان فبيقوله انها طولت فى السلام مع الشخص ده ويكمل بهاء الدين محمد ابداعه فى وصف شعور الحبيبه وهى طبعا متبعاه هى كمان وشايفاه وهو متابعها فى كل حركاتها فعلشان تزود من غيرته تعاند وطول فى كلامها لأنها بكبريائها عاوزاه هو اللى يجى ويقول خلاص تعبت انا مش هكمل الأتفاق ( دهاء حواء هههههه)

الأغنيه فعلا قمه فى الجمال من حيث التنسيق والجمال فى التعبير والكمات ده غير اللحن الرائع جدا واحساس عمرو الرائع دائما

فعلا كلمات الاغنيه جميله

توبيك جميل تسلم

سمسمه

تسلم ايديك يا اس اس

بجد الكلمات جامدة يا صحبى

اصلــى

منورين ياجماعه
وبعدين عمرو دا ملك الاحساس

» الفراق
» وصايا لما بعد الفراق
» (مميز): الفراق مكتوب علينا